KEGIATAN BULAN BAHASA BALI

Nusa Bali kaloktah pinaka destinasi wisata dunia, basa pergaulan ring Bali patut ngwesayang tigang basa luire : 1)pinaka warga negara Indonesia patut nginggilang bahasa Indonesia maka bahasa nasional miwah bahasa persatuan. 2)wed krama Bali gumanti patut sutindih ring basa Bali maka basa ibu ring jagat Bali. 3)Bali pinaka tetujon wisata dunia taler patut sauninga mabasa Inggris (bahasa internasional). Sang wicaksana maosang, aran jagat Bali mawit wenten kruna basa Bali. Indayang resepang pitaken puniki, Kantun kih jagat Bali pacang kawastanin Bali pet prade basa Bali punah? Napike basa Bali druwene kantun ajeg prade krama Bali pinaka panutur basa Bali ten malih uning mabasa Bali? Pitaken kadi punika sering iraga piragi ring masyarakat. Duaning asapunika nampenin pitaken sakadi punika patut kacawis antuk kerja nyata sajeroning ngajegang basa, aksara, lan sastra Bali.

Nitenin kawentenan sakadi ring ajeng sampun kamedalang Peraturan Gubernur Bali Nomor 80 tahun 2018 indik Perlindungan dan Penggunaan Bahasa, Aksara, dan Sastra Bali serta Penyelenggaraan Bulan Bahasa Bali.. Nika te mawinan ring SMP Negeri 3 Bangli sinalih tunggil sekolah formal ring jagat Bali wantah genah sane becik pisan anggen nuntun alit-alit mabasa Bali. Tur sampun karincikang saha kaprogramang bulan bahasa Bali ring SMP Negeri 3 Bangli kamargiang asasih napkala bulan Pebruari 2019 sane mabantang (tema): NANGUN SAT KERTHI LOKA BALI MALARAPAN NRAJEGANG BASA, AKSARA, MIWAH SASTRA BALI.